*
تبصرہ نگاری*
برائے
جماعت نہم و دہم
*تبصرہ نگاری کسے
کہتے ہیں ؟*
کسی تحریر، کتاب، واقعے
یا موضوع پر تنقیدی، تجزیاتی اور رائے پر مبنی اظہارِ خیال کو تبصرہ کہتے ہیں۔
*تبصرہ نگاری کے
بنیادی اصول کیا ہیں؟*
1. آغاز: موضوع کا تعارف
عمومی صورتحال کا ذکر۔
2. تجزیہ اور دلائل:
موضوع کا گہرائی سے جائزہ لے کر اس کے مثبت اور منفی پہلوؤں کو مختصر اور جامع
انداز میں پیش کرنا، دلائل اور مثالوں سے وضاحت کرنا۔
3. رائے یا تجاویز: آخر
میں تبصرہ مؤثر بنانے کے لیے دلیل، حوالوں اور مستند شواہد کا استعمال کرنا چاہیے
تاکہ رائے زیادہ معتبر اور قابلِ قبول ہو۔
4. پیراگراف لازمی
بنائیں۔
*تبصرہ نگاری شروع
کرنے کے لیے درج ذیل پانچ نمونے کے جملے استعمال کیے جا سکتے ہیں* :
1. عمومی تعارف والا
تبصرہ:
"زیرِ بحث موضوع
اپنی اہمیت اور اثرات کے لحاظ سے ہمارے معاشرے میں ایک نمایاں مقام رکھتا ہے، جس
پر غور و فکر ناگزیر ہے۔"
2. تاریخی و سماجی پس
منظر والا تبصرہ:
"اگر ہم تاریخ پر
نظر ڈالیں تو معلوم ہوگا کہ یہ مسئلہ ہمیشہ سے انسانی زندگی پر گہرے اثرات مرتب
کرتا آیا ہے، اور آج بھی اس کی اہمیت برقرار ہے۔"
3. ادبی و فکری پہلو:
"یہ موضوع نہ صرف
فکری وسعت کا حامل ہے بلکہ اس پر کئی دانشوروں اور مفکرین نے اپنے خیالات کا اظہار
کیا ہے، جو اس کی معنویت کو مزید واضح کرتے ہیں۔"
4. موضوع کی عصری اہمیت:
"موجودہ دور میں،
جہاں دنیا تیزی سے بدل رہی ہے، یہ موضوع پہلے سے بھی زیادہ توجہ اور سنجیدہ غور و
خوض کا متقاضی ہے۔"
5. قاری کو متوجہ کرنے
والا جملہ:
"کیا ہم نے کبھی غور
کیا ہے کہ اس مسئلے کا ہماری روزمرہ زندگی پر کیا اثر پڑتا ہے؟ اگر نہیں، تو اب
وقت آگیا ہے کہ ہم اس پر سنجیدگی سے سوچیں۔"
یہ جملے کسی بھی موضوع پر
تبصرہ نگاری کی مؤثر اور پراثر آغاز کے لیے معاون ثابت ہو سکتے ہیں۔
نمونہ
تبصرہ نگاری
سوال:
موسمیاتی
تبدیلیوں کے ذمہ دار انسانی عوامل ہیں۔ کیا آپ اس نکتے سے اتفاق کرتے ہیں؟ اپنا
تبصرہ تحریر کیجیے۔
جواب: میں اس نکتے سے اتفاق کرتا ہوں کہ موجودہ دور کی
موسمیاتی تبدیلیوں میں انسانی عوامل کا کردار نمایاں ہے۔ اگرچہ زمین کے موسم میں
قدرتی تغیرات ہمیشہ سے آتے رہے ہیں، لیکن جس تیزی اور شدت سے آج درجۂ حرارت میں
اضافہ، گلیشیئرز کا پگھلنا اور بارشوں کے نظام میں بگاڑ دیکھا جا رہا ہے، وہ بڑی
حد تک انسانی سرگرمیوں کا نتیجہ ہے۔
صنعتی
انقلاب کے بعد فوسل فیول (کوئلہ، تیل اور گیس) کے بے دریغ استعمال سے فضا میں
کاربن ڈائی آکسائیڈ اور دیگر گرین ہاؤس گیسوں کی مقدار میں غیر معمولی اضافہ ہوا
ہے۔ جنگلات کی کٹائی نے اس مسئلے کو مزید سنگین بنا دیا ہے، کیونکہ درخت کاربن ڈائی
آکسائیڈ جذب کر کے ماحول کو متوازن رکھتے ہیں۔ شہری آبادی میں اضافہ، گاڑیوں اور
کارخانوں کا دھواں، اور پلاسٹک کا بے جا استعمال بھی ماحولیاتی آلودگی میں اضافہ
کر رہے ہیں۔
عالمی
موسمیاتی اداروں کی رپورٹس کے مطابق موجودہ عالمی حدت (گلوبل وارمنگ) کی بنیادی
وجہ انسانی سرگرمیاں ہیں۔ اسی طرح اقوام متحدہ بھی بارہا خبردار کر چکی ہے کہ اگر
کاربن کے اخراج میں کمی نہ کی گئی تو آئندہ نسلوں کو شدید ماحولیاتی بحران کا
سامنا کرنا پڑے گا۔
اگرچہ
قدرتی عوامل جیسے آتش فشانی عمل یا شمسی سرگرمیاں بھی موسمیاتی نظام پر اثر انداز
ہوتے ہیں، مگر موجودہ دور میں انسانی مداخلت نے ان اثرات کو کئی گنا بڑھا دیا ہے۔
اس لیے یہ کہنا بجا ہے کہ آج کی موسمیاتی تبدیلیوں کے بنیادی ذمہ دار انسان خود ہیں۔
لہٰذا
وقت کی ضرورت ہے کہ ہم توانائی کے متبادل ذرائع اختیار کریں، شجرکاری کو فروغ دیں،
اور ماحولیاتی تحفظ کو اپنی اجتماعی ذمہ داری سمجھیں تاکہ زمین کو آنے والی نسلوں
کے لیے محفوظ بنایا جا سکے۔
تبصرہ
نگاری نمونہ نمبر :2
سوال
نمبر 3: انسان میں فطرت غصہ ہے۔ جب اسکی مرضی اور مزاج کے خلاف کوئی بات پیش آتی
ہے تو اس میں غصے کی آگ بھڑک اٹھتی ہے ، اسکی رگیں پھول جاتی ہیں۔ چہرہ اور آنکھیں
سرخ ہو جاتی ہیں، ہاتھ پاؤں کانپنے لگتے ہیں اور زبان لڑکھڑانے لگتی ہے۔ اسکی دماغی
حالت اپنے قابو میں نہیں رہتی، یہی وہ وقت ہوتا ہے جب وہ ایسے فیصلے کرتا ہے جنکی
وجہ سے اسکا مستقبل برباد ہو جاتا ہے۔
(i) غصہ انسان کو
بہت سی حسرتوں، مایوسیوں، ناکامیوں سے دوچار کرتا ہے۔
(ii) اس پر ضبط
کرنا بہت سی خوشیوں اور شادمانیوں کا ذریعہ بنتا ہے۔
(iii) غصے پر قابو
پانے کی دو تجاویز تحریر کرتے ہوئے تبصرہ کریں۔
جواب: غصہ انسان کی فطرت میں شامل ایک ایسا جذبہ ہے
جو بسا اوقات اس کے لیے نقصان دہ ثابت ہوتا ہے۔ جب انسان کی خواہشات کے خلاف کوئی
بات پیش آتی ہے تو وہ اپنے جذبات پر قابو کھو بیٹھتا ہے۔ اس کیفیت میں انسان درست
اور غلط کی تمیز نہیں کر پاتا اور ایسے فیصلے کر بیٹھتا ہے جن پر بعد میں پچھتانا
پڑتا ہے۔ یہی وجہ ہے کہ غصہ انسان کو حسرتوں، مایوسیوں اور ناکامیوں کی طرف لے
جاتا ہے۔ بہت سے رشتے ٹوٹ جاتے ہیں، مواقع ضائع ہو جاتے ہیں اور انسان تنہائی کا
شکار ہو جاتا ہے۔
اس
کے برعکس اگر انسان اپنے غصے پر قابو پا لے تو یہی عمل اس کے لیے کامیابی اور خوشی
کا ذریعہ بن جاتا ہے۔ برداشت، صبر اور تحمل انسان کی شخصیت کو نکھارتے ہیں اور اسے
دوسروں کی نظروں میں معزز بناتے ہیں۔ جو لوگ اپنے جذبات پر قابو رکھتے ہیں وہ نہ
صرف بہتر فیصلے کرتے ہیں بلکہ اپنی زندگی میں سکون اور اطمینان بھی حاصل کرتے ہیں۔
اس طرح وہ معاشرے میں ایک مثبت کردار ادا کرتے ہیں اور دوسروں کے لیے مثال بن جاتے
ہیں۔
غصے
پر قابو پانے کے لیے چند مؤثر تجاویز اختیار کی جا سکتی ہیں۔ پہلی تجویز یہ ہے کہ
انسان غصے کی حالت میں فوراً خاموشی اختیار کرے اور کچھ دیر کے لیے خود کو اس
ماحول سے الگ کر لے تاکہ جذبات ٹھنڈے ہو سکیں۔ دوسری تجویز یہ ہے کہ وضو کرنا یا
پانی پینا اختیار کیا جائے، کیونکہ اس سے جسم اور ذہن کو سکون ملتا ہے۔ ان طریقوں
پر عمل کر کے انسان نہ صرف اپنے غصے کو قابو میں رکھ سکتا ہے بلکہ ایک کامیاب اور
خوشگوار زندگی بھی گزار سکتا ہے۔
