حصہ نظم
نظم: حمد

(صنفِ نظم: قصیدہ)
شاعر: مولانا الطاف حسین حالؔی

شاعر مولانا الطاف حسین حالؔی کے اندازِ کلام کی چند خصوصیات:

1: سادہ زبان کا استعمال: مولانا الطاف حسین حالی ؔ نے اپنے کلام میں انتہائی سادہ اور عام فہم زبان کا استعمال کیا ہے۔

2: مقصدیت: حالیؔ کے کلام میں مقصدیت پائی جاتی ہے۔ ان کی تمام نظموں کا موضوع زیادہ تر مذہبی ، اخلاقی اور اصلاحی ہے۔

3:حقیقت کا عنصر: حالیؔ کی شاعری میں اصلیت اور حقیقت کا عنصر غالب نظر آتاہے۔

نظم حمد کا مرکزی خیال:

اس نظم میں شاعر مولانا الطاف حسین حالیؔ نے اللہ تعالیٰ کی تعریف بیان کرتے ہوئے اس کی چند صفات کا ذکر کیا ہے۔ اللہ تعالیٰ کامل، مالک، جلیل، جمیل، اور محیط ہے۔ جو شخص ایک بار اللہ کا جلوہ دیکھ لےپھر اسے کسی دوسرے کی شان و شوکت متاثر نہیں کر سکتی۔ بشریت کی بنا پر اگر انسان تمام حقوق اللہ ادا نہ کر پائے تو پھر بھی اپنے خدا کی محبت اس کے دل میں سمائی رہتی ہے۔

نظم حمد کی تشریح:

شعر نمبر :١

کامل ہے جو ازل سے وہ ہے کمال تیرا

باقی ہے جو ابد تک وہ ہے جلال تیرا

حوالہ: یہ شعر مولانا الطاف حسین حالؔی کی نظم حمد سے لیا گیا ہے۔ اس نظم میں شاعر اللہ تعالیٰ کی بلند شان بیان کر رہا ہے۔

تشریح: اس شعر میں شاعرنے اللہ کی صفات کامل اور باقی کی وضاحت کرتے ہوئے اللہ کی بلند شان بیان کی ہے کہ اللہ تعالیٰ کا وجودِ کامل اس کائنات کے آغاز سے ہے اور اس کے اختتام کے بعد بھی قائم رہے گا۔ ہر شے فنا ہو جائے گی اگر کوئی چیز ہمیشہ باقی رہے گی تو وہ اے اللہ تیری ذات، تیری قدرت کا جلوہ اور شان و شوکت ہے۔اے اللہ تو ایک ماہر کاریگر ہے، ایسا کاریگر جس کی بنائی ہوئی ہر چیز تمام نقائص سے پاک ہے ۔ اور تیری قدرت کے کارخانے میں کوئی خامی نہیں ہے۔

حسنِ بیان: اس شعر میں شاعر انتہائی دلکش انداز میں اللہ کی صفت کامِل کا ذکر کیا ہے۔

شعر نمبر :2

ہے عارفوں کو حیرت اور منکروں کو سکتہ

ہر دل پر چھا رہا ہے رعبِ جمال تیرا

تشریح: اس شعر میں شاعر اللہ کی بلند شان بیان کرتے ہوئے کہتا ہے کہ اے اللہ تیرے حسن و جمال کا رعب و دبدبہ اس قدر شان والا ہے کہ ہر کوئی اس سے مرعوب ہو جاتا ہے۔ وہ لوگ جو تجھ پر ایمان لاتے ہیں جب تیری قدرت کے جلووں کا نظارہ کرتے ہیں تو حیرت کے سمندروں میں ڈوب جاتے ہیں۔ اور کفار جو تیرا انکار کرتے ہیں تیری خدائی کو دیکھ کر ان پر بیہوشی کی حالت طاری ہو جاتی ہے۔ وہ جب دیکھتے ہیں کہ اگر اتنا بڑا نظامِ کائنات بہترین طریقے سے چل رہا ہے تواس نظام کو چلانے والی ہستی کتنی عظیم ہوگی۔وہ لاجواب ہو جاتے ہیں۔اُن کے پاس اللہ کے وجود کو رد کرنے کی کوئی دلیل نہیں بچتی۔

حسنِ بیان: اس شعر میں شاعر انتہائی دلکش انداز میں خدا کی خدائی کا ذکر کیا ہے۔

شعر نمبر :3

گو حکم تیرے لاکھوں یاں ٹالتے رہے ہیں
لیکن ٹلا نہ ہرگز دل سے خیال تیرا

حوالہ: یہ شعر مولانا الطاف حسین حالؔی کی نظم حمد سے لیا گیا ہے۔ اس نظم میں شاعر اللہ تعالیٰ کی بزرگی بیان کر رہا ہے۔

تشریح: اس شعر میں شاعر کہتا ہے کہ اگرچہ اس دنیا میں بہت سے لوگ ہیں جو تیری حکم عدولی کرتے ہیں۔ تیرے نافرمان ہیں اور تیری عبادت اور ذکر سے غافل ہیں، لیکن ان کے دلوں سے تیری یاد نہیں جاتی۔ اے اللہ یہ کسی نہ کسی نام سے کسی نہ کسی انداز سے تجھے ضرور یاد کرتے ہیں۔ جب بھی یہ لوگ کسی مشکل میں ہوتے ہیں تو اےاللہ یہ صرف تجھے ہی مدد کے لیے پُکارتے ہیں۔

حسنِ بیان: اس شعر میں شاعر انتہائی دلکش انداز میں خدا کی خدائی کا ذکر کیا ہے۔

شعر نمبر :4

پھندے سے تیرے کیو ں کر جائے نکل کے کوئی

پھیلا ہوا ہے ہر سُو عالم میں جال تیرا

تشریح: اس شعر میں شاعر کہتا ہے کہ اے اللہ تیری بادشاہت پوری کائنات پر پھیلی ہوئی ہے۔ چھوٹے سے چھوٹے ذرے سے لے کر کہکشاؤں کی بلندیوں تک تیری نظر ہے۔ تو ہم سب کے دلوں کے حالات تک جانتا ہے، تو یہ کیسے ممکن ہے کہ کوئی بُرائی کرنے والا تیری پکڑ، تیری گرفت اور تیری نظروں سے بچ سکے۔ تو ہماری شہ رگ سے بھی زیادہ قریب ہے۔ ہر اک چیز پر اےخدا تیری گرفت مضبوط ہے۔

حسنِ بیان: اس شعر میں شاعر انتہائی دلکش انداز میں خدا کی خدائی کا ذکر کیا ہے۔

شعر نمبر :5

ان کی نظر میں شوکت جچتی نہیں کسی کی
آنکھوں میں بس رہا ہےجن کی جلال تیرا

تشریح: اس شعر میں شاعر کہتا ہے کہ اے اللہ تو بہت بلند شان والا ہے۔ تیری عظمت اور شان و شوکت کے جلووں کو جس نے پہچان لیا اس کی نظروں میں اب دنیا کی کوئی بھی قیمتی چیز کوئی حیثیت نہیں رکھتی۔ اللہ کی ذات بہت بلند شان والی ہے اور اس کا مقابلہ کرنے کیلیے دنیا کی کوئی چیز نہیں ہے، وہ بہت عظیم ہے۔

حسنِ بیان: اس شعر میں شاعر انتہائی دلکش انداز میں اللہ کی بلند شان کا ذکر کیا ہے۔

شعر نمبر :6

دل ہو کہ جان تجھ سے کیوں کر عزیز رکھیے
دل ہے سو چیز تیری، جاں ہے سو مال تیرا

حوالہ: یہ شعر مولانا الطاف حسین حالؔی کی نظم حمد سے لیا گیا ہے۔ اس نظم میں شاعر اللہ تعالیٰ سے محبت کا اظہار کر رہا ہے۔

تشریح: اس شعر میں شاعر اللہ سے بے انتہا محبت کا اظہار کرتے ہوئے کہہ رہا ہے کہ اے اللہ تو ہمیں دل و جان سے بھی زیادہ پیارا ہے۔ زندگی تیری ہی دی ہوئی ہے، دل کی دھڑکنیں تیری عطا کردہ ہیں، اگر تیری راہ میں ہماری جان کی ضرورت پڑے گی تو ہم بلا جھجھک قربانی دینے کیلیے تیار ہیں۔

حسنِ بیان: اس شعر میں شاعر انتہائی دلکش انداز میں اللہ تعالیٰ سے محبت کا اظہار کیا ہے۔

شعر نمبر :7

بیگانگی میں حالی ؔ یہ رنگِ آشنائی
سُن سُن کے سر دھُنیں گے حال اہلِ قال تیرا

تشریح: اس شعر میں شاعر کہتا ہے کہ اے اللہ تیرا ذکر اتنا دلکش ہے کہ صرف اسی سے ہی دلوں کو سکون ملتا ہے۔ جو لوگ تیری یاد سے غافل ہیں، اور تجھ سے بے تعلق ہیں جب ان کے سامنے تیرا ذکر کیا جاتا ہے تو ان کے دلوں میں تیری محبت جاگتی ہے۔ شاعر کہتا ہے کہ اے اللہ جب بھی کسی محفل میں تیری حمد پڑھی جاتی ہے، تیرا ذکر کیا جاتا ہے سُننے والوں پر عجیب سی کیفیت طاری ہو جاتی ہے اور وہ تیری تعریف کیے بغیر نہیں رہ سکتے۔

حسنِ بیان: اس شعر میں شاعر انتہائی دلکش انداز میں اللہ تعالیٰ سے محبت کا اظہار کیا ہے۔

نظم : نعت

(صنفِ نظم: قصیدہ)
شاعر: امیر مینائی

شاعر امیر مینائی کے اندازِ کلام کی چند خصوصیات:

1: روانی اور سلاست: امیر مینائی کا کلام روانی اور سلاست کیلیے مشہور ہے۔ الفاظ کا توازن رکھنے اور تشبیہات کے استعمال میں ان کو کمال حاصل تھا۔

2: فصاحت و بلاغت: امیر مینائی کے کلام میں اعلیٰ تخیل ، فصاحت و بلاغت اور جوشِ اعتقاد پایا جاتا ہے۔

3:شگفتگی : ان کی شاعری میں شگفتگی ، نزاکتِ خیال، شیرینی اور تصوف کی چاشنی نمایاں دکھائی دیتی ہے۔

نظم نعت کا مرکزی خیال:

شاعر امیر مینائی آنحضرت ﷺ کی شان میں نعت لکھنے کیلیے استعمال ہونے والی ہر شے ایسی چاہتا ہے جو پاکیزگی میں اعلیٰ معیار کی ہو۔ تاکہ وہ ایسے اعلیٰ و ارفع اشعار لکھے جو بارگاہِ رسالتﷺ میں شرفِ قبولیت حاصل کریں اور کہیں آپﷺ کی شان اقدس میں کوئی گستاخی نہ ہو جائے ۔ آنحضرت ﷺ ہی وہ بابرکت وجود ہیں جن کے دنیا میں تشریف لانے سے شرک اور کفر کی تاریکی ختم ہو گئی اور ہر طرف اسلامی تعلیمات کا نور پھیل گیا۔

نظم نعت کی تشریح:

شعر نمبر :1

جو کوثر سے دھوؤں زبانِ قلم
تو نعتِ محمد کروں میں رقم

حوالہ: یہ شعر امیر مینائی کی نظم نعت سے لیا گیا ہے۔ اس نعت میں شاعر رسولِ کریم ﷺ سے محبت کا اظہار کر رہا ہے۔

تشریح: اس شعر میں شاعر کہتا ہے کہ وہ آپﷺ کی شان میں نعت لکھنا چاہتا ہے۔ لیکن اس بابرکت کام کیلیے اسے پاکیزہ چیزیں درکار ہیں۔ کیونکہ وہ سرورِ کائنات اور محسنِ انسانیت ﷺ کے بارے اشعار لکھنا چاہتا ہے، اسلیے اس کا قلم بھی جنت کےحوض کے پانی سے دھُلا ہونا چاہیے۔ دراصل شاعر خاص احتیاط کرنا چاہتا ہے تاکہ اس کی شاعری میں پاکیزگی پیدا ہو اور کہیں نبی پاکﷺ کی شان میں گستاخی نہ ہو جائے اور اس کے قلم سے صرف وہی پاکیزہ الفاظ ہی لکھے جائیں جو آپ کے شایانِ شان ہیں۔

حسنِ بیان: اس شعر میں شاعر نے استعارے کا استعمال کرتے ہوئے انتہائی شگفتہ انداز میں آنحضرت ﷺ سے عقیدت کا اظہار کیا ہے۔

شعر نمبر :2
ورق پردہ دیدہ حور ہو

قلم شاخِ نخلِ سرِ طور ہو

حوالہ: یہ شعر امیر مینائی کی نظم نعت سے لیا گیا ہے۔ اس نعت میں شاعر رسولِ کریم ﷺ سے محبت کا اظہار کر رہا ہے۔

تشریح: اس شعر میں شاعر کہتا ہے کہ وہ آپﷺ کی شان میں نعت لکھنا چاہتا ہے۔ لیکن اس بابرکت کام کیلیے اسے پاکیزہ چیزیں درکار ہیں۔ کیونکہ وہ سرورِ کائنات اور محسنِ انسانیت ﷺ کے بارے اشعار لکھنا چاہتا ہے، اسلیے نعت لکھنے کیلیے اسے پاک ورق چاہیے جیسا کہ جنت کی حوروں کے چہرے پر پڑا پردہ پاکیزہ ہوتا ہے۔ جس میں سے انھوں نے کبھی کسی پر غلط نظریں نہیں ڈالیں۔ اور لکھنے والا قلم کوئی عام قلم نہ ہو بلکہ اس کی خواہش ہے کہ طور پہاڑ پر واقع اس درخت کی شاخ سے قلم بنا ہوا ہو جس درخت کے نیچے حضرت موسیٰ ؑ نے خدا سے کلام کیا تھا۔ دراصل شاعر اپنے کلام میں پاکیزگی کا اعلیٰ معیار قائم کرنا چاہتا ہے۔

حسنِ بیان: اس شعر میں شاعر نےاستعارہ اور تلمیح کا استعمال کرتے ہوئے آنحضرت ﷺ سے عقیدت کا اظہار کیا ہے۔

شعر نمبر :3
سیاہی جو درکار ہو، سب ملک

مجھے اپنی آنکھوں کی دیں مردمک

حوالہ: یہ شعر امیر مینائی کی نظم نعت سے لیا گیا ہے۔ اس نعت میں شاعر رسولِ کریم ﷺ سے محبت کا اظہار کر رہا ہے۔

تشریح: اس شعر میں شاعر کہتا ہے کہ وہ آپﷺ کی شان میں نعت لکھنا چاہتا ہے۔ لیکن اس بابرکت کام کیلیے اسے پاکیزہ چیزیں درکار ہیں۔ کیونکہ وہ سرورِ کائنات اور محسنِ انسانیت ﷺ کے بارے اشعار لکھنا چاہتا ہے، اسلیے نعت لکھنے کیلیے اسے جو سیاہی چاہیے وہ عام سیاہی نہ ہو بلکہ مسلمان بادشاہوں کی پتلیوں کی رنگت سے بنی ہوئی ہو۔ دراصل شاعر اپنے کلام میں مسلمان بادشاہوں کی دور اندیشی چاہتا ہے تاکہ نعت لکھتے ہوئے اس کے کلام میں شاہانہ انداز پایا جائے، کہیں کوئی کمی نہ رہ جائے اور آپ ﷺ کی شان میں گستاخی نہ ہو۔

حسنِ بیان: اس شعر میں شاعر نے تشبیہ کا استعمال کرتے ہوئے آنحضرت ﷺ سے عقیدت کا اظہار کیا ہے۔

شعر نمبر :4
یہ ساماں مہیا ہوں جس دن تمام
لکھوں شوق میں نعتِ خیرالانام

حوالہ: یہ شعر امیر مینائی کی نظم نعت سے لیا گیا ہے۔ اس نعت میں شاعر رسولِ کریم ﷺ سے محبت کا اظہار کر رہا ہے۔

تشریح: اس شعر میں شاعر کہتا ہے کہ وہ آپﷺ کی شان میں نعت لکھنا چاہتا ہے۔ لیکن اس بابرکت کام کیلیے اسے پاکیزہ چیزیں درکار ہیں۔ کیونکہ وہ سرورِ کائنات اور محسنِ انسانیت ﷺ کے بارے اشعار لکھنا چاہتا ہے۔ جب اس کی مطلوبہ پاکیزہ اشیاء میسر ہو جائیں گی تب ہی وہ انتہائی محبت اور عقیدت سے آپ ﷺ کی نعت لکھے گا اوراس نعت میں تمام مخلوقات میں افضل ترین وجود حضور صلى الله عليه وآله وسلم کی شان بیان کرے گا۔

حسنِ بیان: اس شعر میں شاعر نے انتہائی خوبصورت الفاظ کا استعمال کرتے ہوئے آنحضرت ﷺ سے عقیدت کا اظہار کیا ہے۔

شعر نمبر :5
اُسی نور سے دفع ظلمت ہوئی
سرافراز ایماں سے خلقت ہوئی

حوالہ: یہ شعر امیر مینائی کی نظم نعت سے لیا گیا ہے۔ اس نعت میں شاعر رسولِ کریم ﷺ سے محبت کا اظہار کر رہا ہے۔

تشریح: اس شعر میں شاعر آنحضرت کی بلند شان بیان کرتا ہے۔ شاعر کہتا ہے کہ اسلام سے قبل دنیا جہالت کی تاریکیوں میں ڈوبی ہوئی تھی۔ شرک اور بت پرستی عام تھی۔ یہ آپﷺ کا وجودِ پاک ہی ہے جس نے اسلام کا علم بلند کیا اور لوگوں کو ایمان کی دولت سے مالا مال کیا انھیں توحید کا درس دیا۔ آپ ﷺ کی برکت سے تمام مخلوقات کو ان کا اصل مقام ملا اور معاشرے میں انکی عزت افزائی ہوئی۔ آپﷺ نے ہم سب کو حقوق اللہ کے ساتھ ساتھ حقوق العباد بھی سکھائے۔ قیامت تک آپﷺ کی زندگی ہمارے لیے عملی نمونہ ہے۔

حسنِ بیان: اس شعر میں شاعر نے انتہائی خوبصورت الفاظ کا استعمال کرتے ہوئے آنحضرت ﷺ کی بلند شان بیان کی ہے۔

نظم: صبح کا منظر

(صنفِ نظم: موضوع :مرثیہ، ساخت: مسدس)

شاعر: میر ببر علی انیس

شاعر میر ببر علی انیس کے اندازِ کلام کی چند خصوصیات:

1: مرثیہ گوئی: میر انیس نے بھی عام مرثیہ گو شاعروں کی طرح مبالغہ آرائی سے کام لیا ہے۔ مگر ان کے مرثیوں کی خوبی یہ ہے کہ لوگ اس کو سچ ماننے لگے۔

2: منظر کشی: میر انیس کو واقعات کی منظر کشی پر کمال حاصل ہے۔ انکا پُر سوز انداز مناظر کو بھی درد کی تصویر بنا دیتا ہے۔

3:تشبیہات اور استعارات: میر انیس نے اپنے کلام میں تشبیہات اور استعارات کا استعمال بہترین طریقے سے کیا ہے۔

نظم صبح کا منظر کا مرکزی خیال:

رات کے بعد صبح کے آغاز پر جو آسمان پر تبدیلیاں ظاہر ہوتی ہیں اُن کی شاعر نے نہایت دلکش انداز میں منظر کشی کرتے ہوئے میدانِ کربلا میں مہکتی صبح کی پاکیزگی کو ہر صبح سے جُدا کر دیا ہے۔ نیز بہترین استعارات اور تشبیہات کے ذریعے میدانِ کربلا کو چاند ، ستاروں اور کہکشاؤں کے ساتھ ملا دیا ہے۔

نظم صبح کا منظر کی تشریح:

بند نمبر :١

یوں گلشنِ فلک سے ستارے ہوئے رواں
چُن لے چمن سے پھولوں کو جس طرح باغباں

آئی بہار میں گلِ ماہتاب پُر خزاں مرجھا کے گر گئے ثمر و شاخ ِ کہکشاں

دکھلائے طَور بادِ سحر نے سموم کے

پژ مردہ ہو کے رہ گئے غنچے نجوم کے

مشکل الفاظ کے معانی:

الفاظ	معانی	الفاظ	معانی	الفاظ	معانی	الفاظ	معانی
گلشن	باغ	ثمر	پھل	بادِ سحر	صبح کی ہوا	غنچے	کلیاں
باغباں	مالی	کہکشاں	ستاروں کا جھرمٹ	سُموم	لُو، گرم ہوا	نجوم	ستارے
مہتاب	چاند	طَور	طریقہ، قسم	پژ مردہ	مایوس، مرجھائے ہوئے

حوالہ: یہ بند میر ببر علی انیسؔ کی نظم صبح کا منظر سے لیا گیا ہے۔ یہ نظم ایک مرثیہ ہے۔

بند کا مفہوم : اس بند میں شاعر نے میدانِ کربلا میں طلوعِ صبح کی منظر کشی کی ہے۔ شاعر کہتا ہے کہ صبح کے شروع ہوتے ہی آسمان پر چمکتے چاند ستاروں کی بہار بھی خزاں میں تبدیل ہونے لگی تھی۔ اور ایسا لگ رہا تھا جیسے کسی مالی نے باغ سے تمام خوش نما اور خوبصورت پھولوں کو چُن لیا ہو۔ ستاروں کا جھرمٹ آہستہ آہستہ اس طرح غائب ہو رہا تھا جیسے باغ کے پھل اور شاخیں مُرجھا کر گِر گئی ہوں۔ زمین پر بھی صورتحال تبدیل ہو چکی تھی۔ صبح کی تازہ ہوا کی ٹھنڈک اب گرم ہو رہی تھی۔ صبح کے نور کی وجہ سے غائب ہوتے ستارے بند کلیوں کی طرح مرجھائے دکھائی دے رہے تھے۔ ہر طرف مایوسی پھیل گئی تھی۔

حسنِ بیان: اس بند میں شاعر نےمیدانِ کربلا کی صبح کی انتہائی دلکش انداز میں منظر کشی کی ہے۔

بند نمبر: 2

چھپنا وہ ماہتاب کا وہ صبح کا ظہور
یادِ خدا میں زمزمہ پردازیِ طُیور

وہ رونق اور وہ سرد ہوا وہ فضا وہ نور
خُنکی ہو جس سے چشم کو اور قلب کو سرور

انسان زمیں پہ محو مَلَک آسمان پر

جاری تھا ذکرِ قدرتِ حق ہر زبان پر

مشکل الفاظ کے معانی:

الفاظ	معانی	الفاظ	معانی	الفاظ	معانی	الفاظ	معانی
مہتاب	چاند	زمزمہ پرداز	سُریلے گیت گانے والے	چشم	آنکھ	محو	مصروف
ظہور	ظاہر ہونا	طُیور	پرندے	قلب	دِل	مَلَک	فرشتے
زمزمہ	ترانہ، گیت، نغمہ	خُنکی	ٹھنڈک	سرور	خوشی

حوالہ: یہ بند میر ببر علی انیسؔ کی نظم صبح کا منظر سے لیا گیا ہے۔ یہ نظم ایک مرثیہ ہے۔

بند کا مفہوم : اس بند میں شاعر نے میدانِ کربلا میں طلوعِ صبح کی منظر کشی کی ہے۔ شاعر کہتا ہے کہ رات کے جاتے ہی چاند چھُپ گیا تھا اور صبح کا اُجالا پھیل رہا تھا۔ زمین پر تمام پرندے خُدا کی یاد میں گیت گا رہے تھے۔ صبح کی تازہ ٹھنڈی ہوا سے فضا پُر رونق تھی۔ یہ ایسا ماحول تھا کہ جس سے آنکھوں کو ٹھنڈک اور دل کو سکون مل رہا تھا۔ زمین پر انسان خُدا کی عبادت کررہے تھے اور آسمان پر فرشتے اللہ کا ذکر کر رہے تھے۔ الغرض ہر چیز اپنے مالکِ حقیقی کی یاد میں مصروف تھی اور اسکی عبادت کر رہی تھی۔

حسنِ بیان: اس بند میں شاعر نےمیدانِ کربلا کی صبح کی انتہائی دلکش انداز میں منظر کشی کی ہے۔

بند نمبر: 3

وہ سُرخی شفق کی اُدھر چرخ پر بہار
وہ بار وَر درخت وہ صحرا وہ سبزہ زار
شبنم کے وہ گلوں پہ گہر ہائے آبدار
پھولوں سے بھرا ہوا دامانِ کوہسار
نافے کھلے ہوئے تھے وہ گُلوں کی شمیم کے
آتے تھے سرد سرد وہ جھونکے نسیم کے

مشکل الفاظ کے معانی:

الفاظ	معانی	الفاظ	معانی	الفاظ	معانی	الفاظ	معانی
چرخ	آسمان	صحرا	ریگستان، ویرانہ	شفق	افق پر دکھائی دینے والی سرخی	نافے	مشک(خوشبو) کی تھیلیاں
بار ور	پھلدار	سبزہ زار	سرسبز میدان	شبنم	اَوس کے قطرے	شمیم	مہک ، خوشبو

حوالہ: یہ بند میر ببر علی انیسؔ کی نظم صبح کا منظر سے لیا گیا ہے۔ یہ نظم ایک مرثیہ ہے۔

بند کا مفہوم : اس بند میں شاعر نے میدانِ کربلا میں طلوعِ صبح کی منظر کشی کی ہے۔ شاعر کہتا ہے کہ جونہی صبح ہوئی افق پر سُرخ رنگ پھیل گیا تھا۔ جس کی وجہ سے نہ صرف آسمان بلکہ زمین پر موجود ہر درخت خواہ وہ ریگستانی ہو یا سرسبز میدانوں والا ، بہار کا منظر پیش کر رہا تھا۔اَوس کے قطرے پتوں اور پھولوں پر پڑے موتیوں کی طرح چمک رہے تھے۔ صبح کی روشنی میں پہاڑوں وادیاں پھولوں سے بھری ہوئی دکھائی دے رہی تھیں۔ ہر طرف پھولوں کی خوشبو اور مہک پھیلی ہوئی تھی۔ ایسا لگ رہا تھا جیسے کسی نے مُشک کی تھیلیاں کھول دی ہوں۔ ہر طرف ٹھنڈی ٹھنڈی ہوا چل رہی تھی۔

حسنِ بیان: اس بند میں شاعر نےمیدانِ کربلا کی صبح کی انتہائی دلکش انداز میں منظر کشی کی ہے۔

بند نمبر: 4

تھی دشتِ کربلا کی زمین رشک آسماں
تھا دور دور تک شبِ ماہتاب کا سماں
چھٹکے ہوئے ستاروں کا ذروں پہ تھا گُماں
نہرِ فرات بیچ میں تھی مثلِ کہکشاں
سرسبز جو درخت تھا وہ نخل ِ طور تھا
صحرا کے ہر نہال کا سایہ بھی نور تھا

مشکل الفاظ کے معانی:

الفاظ	معانی	الفاظ	معانی	الفاظ	معانی	الفاظ	معانی
دشت	ویرانہ ، جنگل	سماں	منظر	نہرِ فرات	عراق کا دریائے فرات	نہال	خوشحال، کامیاب،
رشک	حسد، جلن، کسی کے برابر ہونے کی خواہش	چھٹکے ہوئے	پھیلے ہوئے	مثل	مثال، کی طرح	نہال	چھوٹا درخت، پودا

حوالہ: یہ بند میر ببر علی انیسؔ کی نظم صبح کا منظر سے لیا گیا ہے۔ یہ نظم ایک مرثیہ ہے۔

بند کا مفہوم : اس بند میں شاعر نے میدانِ کربلا میں طلوعِ صبح کی منظر کشی کی ہے۔ شاعر کہتا ہے کہ میدانِ کربلا کی زمین اتنی خوبصورت لگ رہی تھی کہ آسمان بھی اس پر رشک کر رہا تھا اور اس کی برابری کی خواہش کر رہا تھا۔ اس ویرانے میں صبح ہو جانے کے بعد بھی ایسا لگتا تھا کہ جیسے چاندنی رات کامنظر ہو۔ میدانِ کربلا کی ریت کے ذرے ستاروں کی مانند چمک رہے تھے۔ دریائے فرات کا پانی اس طرح چمک رہا تھا جیسے ستاروں کا جھرمٹ پانی کی سطح پر اتر آیا ہو۔ شاعر کہتا ہے کہ کربلا کا ہر درخت طور پہاڑ پر واقع اُس بابرکت درخت کی مانند تھا ، جس کے نیچے حضرت موسیٰ ؑ نے خدا سے کلام کیا تھا۔ چھوٹے سے چھوٹے سے پودوں کے سایے بھی بابرکت اور پُر نور تھے۔
حسنِ بیان: اس بند میں شاعر نےمیدانِ کربلا کی صبح کی انتہائی دلکش انداز میں منظر کشی کی ہے۔

نظم: برسات کا تماشا

(صنفِ نظم: مخمس)

شاعر: نظؔیر اکبر آبادی

شاعرنظیر اکبر آبادی کے اندازِ کلام کی چند خصوصیات:

1: فطرت کی مصوری: نظیر اکبر آبادی ایک نئے اور منفرد کلام کے موجد ہیں۔ ان کی شاعری گویا فطرت کی مصوری ہے۔ انھوں نے ایسے موضوع پر طبع آزمائی کی ہے، جن کا خیال بھی کسی کے ذہن میں نہیں آیا ۔

2: جذبات کی ترجمانی: نظیر جذبات کی صحیح ترجمانی کرتے ہیں۔ تصنع / بناوٹ اور ریا کاری کا ان کی شاعری میں کوئی سراغ نہیں ملتا۔

3:منظر نگاری : منظر نگاری اور تصویر کشی میں انہیں کمال حاصل ہے۔ موضوع کی مناسبت سے وہ اپنے کلام میں ایسے الفاظ استعمال کرتے جو مناظر کو اپنی خوبصورتی کے ساتھ اپنی آنکھوں کے سامنے لاتے ہیں۔
4: موسیقیت: ان کی شاعری میں موسیقیت پائی جاتی ہے۔ نظیر نےمٹھاس اور روانی کے حامل الفاظ کا انتخاب کیا ہے۔

نظم برسات کا تماشا کا مرکزی خیال:

سخت گرمی سے نڈھال مخلوقِ خدا کو جب موسمِ برسات میں ابرِ رحمت نصیب ہوتی ہے، تو سب خوشی سے سرشار ہو جاتے ہیں۔ ہر طرف قدرت کا حُسن دکھائی دینے لگتا ہے۔ ہر طرف زمین سبزے سے ڈھک جاتی ہے۔ درخت اور پودے دھُل کر نکھر جاتے ہیں۔ حیوان اور چرند پرند بھی اس موسم سے خوش ہو جاتے ہیں۔ اور طرح طرح سے ناچ گا کر اپنی خوشی کا اظہار کرتے ہیں۔
سوال: نظیر اکبر آبادی کو عوامی شاعر کیوں کہا جاتا ہے ، دو نکات تحریر کریں۔
جواب:
1:نظیر نےعوام کے جذبات کی صحیح ترجمانی کرتے ہوئے ان کے روز مرہ مسائل کی نشاندہی کی ہے۔ بے پردگی سے لے کر غربت تک کو موضوع بنایا ہے۔
2:نظیر نے ایک نئے اور منفرد طرزِ کلام کے ذریعےاپنے ملک کے ہر چھوٹے سے چھوٹے مسئلے پر آواز اٹھائی، جیسے آدمی نامہ۔

مشکل الفاظ کے معانی:

الفاظ	معانی	الفاظ	معانی	الفاظ	معانی	الفاظ	معانی
خورشید	سورج	کوہ	پہاڑ	کُوک	بلند آواز	چھاجوں برسنا	بہت زیادہ بارش ہونا
مول	قیمت	دشت	ویرانہ	رِم جھِم	بارش کی ہلکی آواز	وحش و طیور	جنگلی جانور اور پرندے
زر	دولت	میگھ	بادل، بارش	جھڑی لگانا	لگاتار بارش ہونا	غوغا	شور، غُل
نگر	بستی، علاقہ	گھٹا	کالے بادل	پھُہار	بوندیں	کوکِلا	کوئل
اساڑھ	ہندی کا چوتھا مہینہ برسات کا پہلا مہینہ	رعد	بجلی کی کڑک	اَولتی	پرنالہ	چنگاریں	آوازیں لگائیں/ گیت گائیں

نظم برسات کا تماشا کی تشریح:

بند نمبر :1

خورشید گرم ہو کر نکلا ہے اپنے گھر سے
لیتا ہے مول بادل کر کر تلاش زر سے

آئی ہوا بھی لے کر بادل کو ہر نگر سے
آدھے اساڑھ تو اب دشمن کے گھر سے برسے
آ یار چل کے دیکھیں ، برسات کا تماشا

حوالہ: یہ بند نظیر ؔ اکبر آبادی کی نظم "برسات کا تماشا" سے لیا گیا ہے۔ اس میں شاعر برسات کے موسم کی منظر کشی کر رہے ہیں۔

تشریح: اس بند میں شاعر کہتا ہے کہ موسم برسات شروع ہو گیا ہے مگر ابھی تک بارش نہیں ہوئی ہے۔ سورج پوری آب و تاب کے ساتھ چمک رہا ہے ۔ لوگ گرمی سے بیحال ہیں اور بارش کا انتظار کر رہے ہیں۔ اللہ کاشکر ہے کہ اب ہوا چل پڑی ہے اور مختلف علاقوں سے بادلوں کو جمع کر کے لا رہی ہے۔ برسات کا آدھا مہینہ گزر چکا ہے اور اب تک بارش پرائے دیس میں ہی ہوتی رہی ہے۔ لیکن اب بارش کے آثار دکھائی دے رہے ہیں۔ آؤ دوست ہم مل کر برسات میں ہونے والی اس رحمت کی بارش کا لطف اُٹھائیں۔